Odia news portal

ପାକିସ୍ତାନ ସମେତ ୪ଟି ଦେଶର ମହିଳାଙ୍କୁ ବିବାହ କରିପାରିବେ ନାହିଁ ଏହି ଦେଶର ପୁରୁଷ !

ରିୟାଦ: ସାଉଦି ଆରବ ଏବଂ ପାକିସ୍ତାନ ମଧ୍ୟରେ ଥିବା ତିକ୍ତତାର ଆଉ ଏକ ପ୍ରମାଣ ଏବେ ସାମ୍ନାକୁ ଆସିଛି । ଏନେଇ ସାଉଦି ସରକାର କିଛି ନୂତନ ନିୟମ ପ୍ରଣୟନ କରିଛନ୍ତି, ଯେଉଁଥିରେ ଦେଶର ପୁରୁଷମାନଙ୍କୁ ପାକିସ୍ତାନ, ବାଂଲାଦେଶ, ଚାଡ୍ ଏବଂ ମିଆଁମାର ମହିଳାଙ୍କୁ ବିବାହ କରିବାକୁ ବାରଣ କରାଯାଇଛି । ପାକିସ୍ତାନୀ ଖବରକାଗଜ ‘ଡନ୍’ ସାଉଦି ଗଣମାଧ୍ୟମର ଏକ ରିପୋର୍ଟକୁ ଭିତ୍ତିକରି ଏହି ଖବର ଦେଇଛି । ତେବେ ଅନୌପଚାରିକ ଆକଳନ ଅନୁଯାୟୀ, ବର୍ତ୍ତମାନ ସାଉଦି ଆରବରେ ଏହି ଚାରୋଟି ଦେଶରୁ ପ୍ରାୟ ୫ ଲକ୍ଷ ମହିଳା ବାସ କରୁଛନ୍ତି ।

ରିପୋର୍ଟ ଅନୁଯାୟୀ, ମକ୍କାର ପୋଲିସ ମହାନିର୍ଦ୍ଦେଶକ ମେଜର ଜେନେରାଲ ଅସଫ ଅଲ-କୁରେଶୀ  ସ୍ପଷ୍ଟ କରିଛନ୍ତି ଯେ ବିଦେଶୀ ମହିଳାଙ୍କୁ ବିବାହ କରିବାକୁ ଚାହୁଁଥିବା ସାଉଦି ପୁରୁଷମାନେ ବର୍ତ୍ତମାନ କଠୋର ନିୟମର ସମ୍ମୁଖୀନ ହେବେ । ସାଉଦି ଆରବ ପୁରୁଷମାନଙ୍କୁ ବିଦେଶୀଙ୍କୁ ବିବାହ ନକରିବାକୁ ଏହି ପଦକ୍ଷେପ ନିଆଯାଇଛି । ଯଦି ଜଣେ ବ୍ୟକ୍ତି ଏହା କରିବାକୁ ଚାହାଁନ୍ତି, ତେବେ ତାଙ୍କୁ ବିଶେଷ ଅନୁମତି ପାଇବା ସହିତ ଅନେକ ଔପଚାରିକତା ପୂରଣ କରିବାକୁ ପଡିବ ବୋଲି ସେ କହିଛନ୍ତି ।

ଏହି ରିପୋର୍ଟରେ କୁରେଶୀ କହିଛନ୍ତି ଯେ ଯେଉଁମାନେ ବିଦେଶୀ ମହିଳାଙ୍କୁ ବିବାହ କରନ୍ତି, ସେମାନେ ପ୍ରଥମେ ସରକାରଙ୍କ ସହମତି ହାସଲ କରିବେ ଏବଂ ସରକାରୀ ଚ୍ୟାନେଲ ମାଧ୍ୟମରେ ବିବାହ ଆବେଦନପତ୍ର ଦାଖଲ କରିବେ । ନିୟମରେ ଏହା ସ୍ପଷ୍ଟ ହୋଇଛି ଯେ ଛାଡପତ୍ର ହୋଇଥିବା ପୁରୁଷମାନଙ୍କୁ ଛାଡପତ୍ରର ୬ ମାସ ମଧ୍ୟରେ ନୂତନ ବିବାହ ପାଇଁ ଆବେଦନ କରିବାକୁ ଦିଆଯିବ ନାହିଁ । ସମସ୍ତଙ୍କୁ ନିୟମକୁ କଡାକଡି ପାଳନ କରିବାକୁ ପଡିବ ଏବଂ ସେମାନଙ୍କ ଉଲ୍ଲଂଘନ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁରେଶୀ କହିଛନ୍ତି ।

ତେବେ ଆବେଦନକାରୀଙ୍କ ବୟସ ୨୫ ବର୍ଷରୁ ଅଧିକ ହେବା ଆବଶ୍ୟକ ଏବଂ ଆବେଦନ ସହିତ ସେମାନେ ସ୍ଥାନୀୟ ଜିଲ୍ଲା ମେୟରଙ୍କ ଦ୍ବାରା ଦସ୍ତଖତ ହୋଇଥିବା ପରିଚୟପତ୍ର ଏବଂ ସେମାନଙ୍କ ପରିବାର କାର୍ଡର ଏକ କପି ସହିତ ଅନ୍ୟ ସମସ୍ତ ପରିଚୟ ପତ୍ର ସଂଲଗ୍ନ କରିବା ଜରୁରୀ । ଜଣେ ଅଧିକାରୀ କହିଛନ୍ତି ଯେ ଯଦି ଆବେଦନକାରୀ ବିବାହିତ, ତେବେ ତାଙ୍କୁ ଡାକ୍ତରଖାନା ରିପୋର୍ଟ ସଂଲଗ୍ନ କରିବାକୁ ପଡିବ ଯାହା ପ୍ରମାଣ କରେ ଯେ ତାଙ୍କ ପତ୍ନୀ ଅକ୍ଷମ କିମ୍ବା ପୁରୁଣା ରୋଗରେ ପୀଡିତ କିମ୍ବା ବନ୍ଧ୍ୟା ଅଟନ୍ତି ।

You might also like

Leave A Reply

Your email address will not be published.