Odia news portal

କାହାପାଇଁ ଆବାସ ଯୋଜନା !

ହାଟଡିହି : ରାଜ୍ୟ ଓ କେନ୍ଦ୍ର ସରକାର ଗରିବଙ୍କ ରହିବା ପାଇଁ ବାସଗୃହ ଯୋଜନା କାର୍ଯ୍ୟକାରୀ କରିଥିବା ବେଳେ ହାଟଡିହି ବ୍ଲକରେ ପ୍ରଧାନମନ୍ତ୍ରୀ ଆବାସ ଓ ବିଜୁ ପକ୍କାଘର ଯୋଜନା କାର୍ଯ୍ୟକାରୀ ହେଉଛି । କିନ୍ତୁ ଅଧିକାଂଶ ପଞ୍ଚାୟତରେ ପ୍ରକୃତ ହୀତାଧିକାରୀ ମାନେ ଏହି ଯୋଜନାରୁ ବଞ୍ଚିତ ହେଉଥିବାବେଳେ କିଛି ଅଯୋଗ୍ୟ ହିତାଧିକାରୀ ଏହାର ଫାଇଦା ନେଉଛନ୍ତି । ଜଣେ ଜଣେ ବ୍ୟକ୍ତି ଦୁଇ ତିନୋଟି ଘର ହାତେଇ ନେଇଥିବାବେଳେ ଆଉ କିଛି ଯୋଗ୍ୟ ବ୍ୟକ୍ତି ଆବାସ ଯୋଜନାକୁ ଚାହିଁ ବସିଛନ୍ତି । ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ଆଇତିପୁର ପଞ୍ଚାୟତରେ । ଗାଁର ଜଣେ ବୃଦ୍ଧା ତାଙ୍କର ୪୦ବର୍ଷୀୟ ଭିନ୍ନକ୍ଷମ ପୁଅକୁ ଧରି ଏକ ଭଙ୍ଗା ଚାଳିଆରେ ବସବାସ କରୁଥିବାବେଳେ ତାକୁ ସରକାରୀ ଆବାସ ମିଳିପାରୁ ନାହିଁ ।

ଖବରରୁ ଜଣାଯାଇଛି ଯେ ଗ୍ରାମର ବେଙ୍ଗ ଦେହୁରୀ ଜଣେ ବିଧବା ମହିଳା ହୋଇଥିବାବେଳେ ତାଙ୍କ ସ୍ୱାମୀଙ୍କର ଆଜକୁ ୪୦ବର୍ଷ ପୂର୍ବେ ଦେହାନ୍ତ ହୋଇଯାଇଛି । ଘରେ କେବଳ ଗୋଟିଏ ଭିନ୍ନକ୍ଷମ ୪୦ବର୍ଷର ପୁଅକୁ ନେଇ ତାଙ୍କ ପରିବାର । ଘରେ ଖାଇବାକୁ ଦାନା ମୁଠେ ନାହିଁ । ସରକାରଙ୍କ ତରଫରୁ ଦିଆଯାଉଥିବା ଭତ୍ତା ଓ ୫କିଲୋ ଚାଉଳରେ ପରିବାର ଚଳେ । ଆଗରୁ ଭିନ୍ନକ୍ଷମ ପୁଅ ମାଗିଯାଚି ଯାହା ଆଣୁଥିଲେ ମା ପୁଅ ସେଥିରେ ଚଳିଯାଉଥିଲେ । କିନ୍ତୁ ୧୦ବର୍ଷ ପୂର୍ବେ ମିଳିଥିବା ଟ୍ରାଇ ସାଇକେଲଟି ଭାଙ୍ଗିରୁଜି ଯାଇଥିବାରୁ ସେ ଆଉ ବାହାରକୁ ଯାଇପାରୁ ନାହାନ୍ତି । ଘୁଷୁରି ଘୁଷୁରି ସେଇ ଘର ଭିତରେ ବୁଲୁଛନ୍ତି । ଘର ବୋଲି ଗୋଟିଏ ଭଙ୍ଗା ଚାଳଘର । ସେଇଠି ରୋଷେଇ ସେଇଠି ଖାଇବା, ଶୋଇବା, ଏପରି ଅବସ୍ଥାରେ ଉଭୟ ମା ପୁଅ ବହୁ ଦୁଃଖ କଷ୍ଟରେ କାଳାତିପାତ କରୁଛନ୍ତି ।

ଘର ଖଣ୍ଡିକ ଛପର କରିବାକୁ ପାଖରେ ତାଙ୍କର ସମର୍ଥ ନଥିବାବେଳେ ଗାଁ ଲୋକଙ୍କ ସହଯୋଗରେ ଛପର କରି ରହିଛନ୍ତି । ଏପରି ଅବସ୍ଥାରେ ତାଙ୍କୁ ଘର ଖଣ୍ଡିଏ ମିଳିପାରିନାହିଁ । ସରପଞ୍ଚଙ୍କ ଦୁଆର ମୁହଁରେ ତାଙ୍କ ଘର ହୋଇଥିବାବେଳେ ବାରମ୍ବାର ଘର ଖଣ୍ଡିଏ ପାଇଁ ଆବେଦନ କରୁଥିଲେବି ସେ ହାତଗୁଞ୍ଜା ଦେଇପାରୁ ନଥିବାରୁ ତାଙ୍କୁ ଘର ମିଳୁନାହିଁ ବୋଲି କୋହଭରା କଣ୍ଠରେ କହିଛନ୍ତି ବେଙ୍ଗ । ଉକ୍ତ ଅସହାୟ ପରିବାରଟିକୁ ତୁରନ୍ତ ବାସଗୃହ ଯୋଜନାରେ ସାମିଲ କରି ଘର ଖଣ୍ଡିଏ ଯୋଗାଇ ଦେବା ସହିତ ତାଙ୍କ ପରିବାରଟିକୁ ଅନ୍ତୋର୍ଦ୍ଦୟ ଯୋଜନାରେ ସାମିଲ କରାଇବାକୁ ବେଙ୍ଗ ଦେହୁରୀ, ପୁଅ ବାଦଲ ଦେହୁରୀ କେନ୍ଦୁଝର ଜିଲ୍ଲାପାଳଙ୍କୁ ନିବେଦନ କରିଛନ୍ତି ।

You might also like

Leave A Reply

Your email address will not be published.